एक प्रेरणादायी व्यक्तिमत्त्व - गणपतराव कणसे.

     मी आज पर्यंत अनेक व्यक्तींना भेटलो, बोललो, अनेक व्यक्तींचा सहवास लाभला आहे. मी समुपदेशनच्या किंवा व्याख्यानाच्या माध्यमातून अनेक व्यक्तींशी माझा परिचय होत असतो.अनेक जेष्ठ, श्रेष्ठ, विचारवंत, लेखक, कवी, कादंबरीकार, लघुनाटिका लिहिणारे अशा अनेक प्रकारचे समाजातील तळागाळातील व्यक्तीपासून ते उच्च पदावर कार्यरत असणारे असे अनेक प्रकारचे लोक मला भेटत असतात. त्यांच्यातील चांगले गुण मला आत्मसात कसे करता येतील, याचा मी नेहमी प्रयत्न करत असतो. काही दिवसांपूर्वी कवितासागर प्रकाशनचे संस्थापक डॉ. सुनिल पाटील भेटले. त्यांनी श्री. गणपतराव रघुनाथराव कणसे सरांच्या कार्याचा उल्लेख केला. 

     मला अशा 60 वर्ष ओलांडून गेल्यावर सुद्धा कणसे सरांचे कार्य, त्यांचा उत्साह, त्याच बरोबर त्यांच्या विविध संकल्प पूर्तीची माहिती मिळाली आणि मी सरांना भेटण्याची उत्सुकता दर्शवली. योगायोगाने कणसे सरांनी केलेल्या कार्याची प्रचिती आली. काही दिवसापूर्वी श्री गणपतराव रघुनाथराव कणसे यांनी 12 मार्च 2012 ते 12 मार्च 2013 या कालावधीत म्हणजेच भारताचे माजी उपपंतप्रधान व महाराष्ट्राचे पहिले मुख्यमंत्री स्व. यशवंतराव चव्हाण साहेबांच्या जीवनातील कष्ट करण्याची ताकद, उत्साह, खंबीर नेतृत्वगुण, सर्व समावेशक प्रगती आणि विकास या सर्वच गोष्टी आजही समाजासाठी अत्यंत आवश्यक आहेत. 

     समाजाला झालेला विसर पुन्हा नव्याने समाजाला सांगण्याचे काम कणसे सरांनी केले आहे आणि तेही स्व. यशवंतराव चव्हाण यांच्या जन्म शताब्दी वर्षामध्ये 80 दिवसामध्ये विविध शाळा-महाविद्यालयामध्ये 208 व्याख्याने देण्याचा एक आगळा वेगळा उपक्रम कणसे सरांनी केला आहे. 2015 साली या उपक्रमाची नोंद " इंडिया बुक ऑफ रेकॉर्डस " या संस्थेने " इंडिया बुक ऑफ रेकॉर्डस 2015" असा किताब कणसे सरांना बहाल केला. सरांनी घेतलेल्या कष्टाचे फळ मिळाले अस म्हणायला काहीही हरकत नाही. असे म्हणतात कि, कोणत्याही अपेक्षा शिवाय कोणाचे हि चांगले करण्याचा प्रयत्न करावा, कारण एक जुनी म्हण आहे. " जे लोक फुलेच वाटण्याचे काम करतात, त्यांच्या हातांनाही नेहमी सुगंध दरवळत राहतो." 

     श्री गणपतराव कणसे सरांनी विविध पदे भूषविली आहेत. स्वतः ज्या शाळेत शिकत होते त्याच शाळेमध्ये अध्यापकाचे काम करून मुख्याध्यापक म्हणून सेवा निवृत्तीचा योग्य का फारच दुर्मिळ व्यक्तीच्या भाग्यात असतो. कोणतेही पद भूषविताना कणसे सर हे नेहमी समजावण्यापेक्षा समजून घेण्यामध्ये खरी परीक्षा असते. कारण समजावण्यासाठी अनुभवाचा कस लागतो तर समजून घेण्यासाठी मनाचा मोठेपणा लागतो आणि जो प्रत्येकाजवळ असतोच असा नाही. असे सांगतात कारण अनेक समस्या ह्या न समजून घेतल्यामुळेच मोठ्या प्रमाणावर निर्माण होत असतात हे खरे आहे. 

     कणसे सरांचे जीवन हे कुठल्याही इमारत सुरुवातीला साधा नकाशा असते, तुंहु आज कुठे आहात हे महत्वाचे नाही तर उद्या कुठे पोहचता हे अत्यंत महत्वाचे असते. अशा प्रकारचे हे प्रेरणादायी व्यक्तिमत्व आहे. नेहमी इतरांना सकारात्मक पद्धतीने सामावून घेण्यात आणि समजावून सांगण्याचे त्यांचे कौशल्य असे अबाधित राहो. फक्त स्वतः चा विचार करणारे लोक फार थोड्या काळासाठी प्रगती करतात परंतु जे सगळ्यांसाठी विचार करतात. त्यांची प्रगती कायम होतच राहते असे प्रेरणादायी व्यक्तिमत्व म्हणजे श्री गणपतराव कणसे सर होय. 

     शेवटी एवढेच म्हणेन कि, आयुष्याला अर्थ आहे का नाही हे महत्वाचे नाही. आपल्या आयुष्यात आपण किती अर्थ भरतो हे महत्वाचे असते. म्हणून आपण अर्थपूर्ण आयुष्य जगण्याचा प्रयत्न केला पाहिजे असे सांगणारे कणसे सर यांना दीर्घायुष्य लाभो आणि पुढील वाटचालीस माझ्याकडून खूप खूप शुभेच्छा देतो.